З 29 па 31 кастрычніка ў Вышэйшай духоўнай семінарыі імя св. Тамаша Аквінскага ў Пінску адбудзецца фармацыйная сустрэча міністрантаў Пінскай дыяцэзіі ва ўзросце ад 13 гадоў.
Удзельнікі будуць мець магчымасць бліжэй пазнаёміцца з разнастайнымі аспектамі літургічнай службы, адчуць рытм жыцця семінарыстаў, весела і пазнавальна правесці час.
Арганізатары просяць кожнага ўдзельніка мець пры сабе комжу, спартыўную вопратку і нататнік.
На сустрэчу таксама запрашаюцца юнакі, якія разважаюць над сваім пакліканнем. Яны будуць мець магчымасць паразмаўляць са святарамі і семінарыстамі, прыняць удзел у духоўна-пазнавальных канферэнцыях, даведацца аб псіхалагічных тонкасцях распазнавання паклікання.
А найбольшым дарам для кожнага можа стаць шырокі спектр магчымасцяў пабыць сам-насам з Езусам у непаўторнай малітоўнай атмасферы семінарыйнай капліцы, у сценах, дзе гартаваліся святыя пакліканні Касцёла на працягу многіх стагоддзяў.
Пра ўдзел у сустрэчы просьба паведаміць праз наступныя кантакты:
e-mail: mvds@catholic.by
тэл.: +375 25 604 41 86; +375 29 727 31 98.
