30 мая адбудзецца прэзентацыя першага поўнага афіцыйнага рыма-каталіцкага выдання на беларускай мове «Новага Запавету» (Мінск, 2017) у Магілёўскай абласной бібліятэцы па адрасе: г. Магілёў, вул. Крыленкі, 8.
Пачатак у 17.00.
Прэзентацыю ўзначаліць Мітрапаліт Мінска-Магілёўскі арцыбіскуп Тадэвуш Кандрусевіч, старшыня Канферэнцыі Каталіцкіх Біскупаў у Беларусі.
Як паведамляе біскупскі вікарый для г. Магілёва і Магілёўскай вобласці біскуп Аляксандр Яшэўскі SDB, на мерапрыемства запрошаны вышэйшае духавенства Праваслаўнай Царквы ў Магілёўскай вобласці і Рыма-Каталіцкага Касцёла, старшыня Магілёўскага аблвыканкама, святары і вернікі парафій Магілёўшчыны, а таксама кіраўнікі аддзелаў ідэалогіі, культуры, адукацыі, па справах моладзі, Упаўнаважаны па справах рэлігій і нацыянальнасцяў, прадстаўнікі магілёўскай гарадской адміністрацыі і Таварыства беларускай мовы імя Францішка Скарыны, прадстаўнікі дабрачыннага фонду «Адкрытыя сэрцы», жыхары горада і вобласці.
У праграме мерапрыемства прадугледжваюцца:
- прывітальныя словы Мітрапаліта Мінска-Магілёўскага арцыбіскупа Тадэвуша Кандрусевіча, прадстаўнікоў Праваслаўнай Царквы, Магілёўскага аблвыканкама і райвыканкама, ганаровых гасцей;
- даклад «Беларускія пераклады Святога Пісання 1926–2017» доктара біблійных навук Марыны Пашук, адказнай за выданне «Новага Запавету»;
- прэзентацыя афіцыйнага рыма-каталіцкага выдання «Новага Запавету» Мітрапалітам Мінска-Магілёўскім Тадэвушам Кандрусевічам, старшынёй Канферэнцыі Каталіцкіх Біскупаў у Беларусі;
- канцэрт духоўнай і беларускай музыкі (жаночы касцёльны хор і хор студэнтаў-інструменталістаў Магілёўскага філіяла БДАМ).
Уваход на прэзентацыю вольны.
