2 лютага, у свята Ахвяравання Пана (Маці Божай Грамнічнай), у Нацыянальным акадэмічным Вялікім тэатры оперы і балета ў Мінску будзе экспанавацца абраз Маці Божай Вастрабрамскай.
Абраз XIX стагоддзя трапіў у Музей старажытнабеларускай культуры Нацыянальнай акадэміі навук з касцёла ў Кобрыне. Гэта копія цудатворнага абраза з санктуарыя Маці Божай у Вострай Браме ў Вільнюсе.
Цудадзейны абраз шануюць як католікі, так і праваслаўныя вернікі. Традыцыйна з абраза рабілі копіі, адна з якіх і захоўваецца сёння ў фондах Музея старажытнабеларускай культуры НАН Беларусі.
2 лютага пра гісторыю цудадзейнага абраза Маці Божай Вастрабрамскай распавядзе дырэктар Музея кандыдат гістарычных навук Барыс Лазутка.
Выстаўка аднаго дня, якая арганізоўваецца сумесна з музеем, стала ўжо традыцыйнай у тэатры оперы і балета. Працягне вечар балет Андрэя Мдзівані «Пакуты (Рагнеда)».
Спектакль расказвае пра падзеі тысячагадовай даўніны, пра старажытны Полацк і князёўну Рагнеду.
