Пошук
15.12.2017 11:07   Вольга Ляшчэвіч / Catholic.by
фота Віталія Палінеўскага

Бэтлеемскі агонь, які традыцыйна перад святамі Божага Нараджэння ў Беларусь прывозяць скаўты, у беларускую сталіцу прыбудзе 20 снежня. Напярэдадні яго даставяць у катэдру ў Гродне.

Раніцай 19 снежня агонь, запалены ад нязгаснай лампады ў базыліцы Нараджэння Пана ў Бэтлееме, будзе дастаўлены на беларуска-польскую мяжу. Затым прадстаўнікі польскага згуртавання скаўтаў ZHP урачыста перададуць агонь з Бэтлеема ў катэдральны касцёл святога Францішка Ксаверыя ў Гродне ў 17.00.

Там эстафету перадачы агню распачнуць каталіцкія скаўткі і скаўты.

20 снежня ў 18.30 Бэтлеемскі агонь даставяць у архікатэдральны касцёл Імя Найсвяцейшай Панны Марыі ў Мінску.

З 19 па 23 снежня каталіцкія скаўты і скаўткі запаляць лампады Бэтлеемскім агнём у касцёлах розных гарадоў і мястэчак Беларусі.

Як агонь прыбывае ў Еўропу?

Кожны год перад святам Божага Нараджэння прадстаўнікі аўстрыйскіх скаўтаў і некалькі супрацоўнікаў Аўстрыйскай тэлерадыёкампаніі накіроўваюцца ў Бэтлеем, каб прывезці сімвал Раства —  агонь нязгаснай лампады, які гарыць у базыліцы Нараджэння Пана.

На самалецё агонь дастаўляюць у Вену. Затым скаўты і скаўткі з рук у рукі перадаюць агонь сваім братам і сёстрам з розных краін. Такім чынам сімвал Божага Нараджэння, а таксама супакою, надзеі і згоды, яднае жыхароў розных краін.

З гісторыі перадачы Бэтлеемскага агню

Гісторыя распаўсюджвання Бэтлеемскага агню налічвае больш за 30 гадоў. У 1986 годзе прадстаўнікі Аўстрыйскай тэлерадыёкампаніі ўпершыню даставілі запаленую ў Бэтлееме лампаду, каб падтрымаць хворых і самотных  людзей напярэданні свята Божага Нараджэння. Акцыю падтрымалі аўстрыйскія скаўты. Дзякуючы іх ініцыятыве яна стала міжнароднай.

У 1998 годзе агонь з Бэтлеема быў дастаўлены ў 22 краіны Еўропы. У 2001 годзе акцыя пашырылася далёка за межы еўрапейскага кантынента: лампада з Бэтлеемскім агнём была перададзена ў ЗША.

На афіцыйным ўзроўні акцыю падтрымліваюць кіраўнікі ўсіх хрысціянскіх Цэркваў Еўропы. У свой час акцыю благаславілі Ян Павел II і Бэнэдыкт XVI. Акцыю падтрымліваюць не толькі царкоўныя іерархі, але і прадстаўнікі дзяржаўных уладаў розных краін Еўропы.

Бэтлеемскі агонь і Беларусь

У 1998 годзе агонь з Бэтлеема быў упершыню запалены ў святынях Беларусі. Гэтая падзея адбылася дзякуючы сябрам польскага згуртавання скаўтаў ZHP.

У 2008 годзе каталіцкія скаўты і скаўткі з Беларусі ўпершыню прынялі ўдзел у акцыі. У гэтым годзе каталіцкія скаўты плануюць перадаць Бэтлеемскі агонь у парафіі больш чым 30 гарадоў і мястэчак Беларусі.

«Перадача Бэтлеемскага агню — прыгожая акцыя, якая аб'ядноўвае хрысціян. І для нас, каталіцкіх скаўтаў, удзельнічаць у гэтай справе — вялікі гонар. Бо што можа быць лепшым, чым прынесці святло Езуса туды, дзе яго чакаюць», — кажа генеральны камісар каталіцкіх скаўтак у Беларусі Юлія Чарніцкая.

«Няхай полымя агню з Бэтлеема нагадвае кожнаму чалавеку аб сапраўднай радасці, якую нясе Езус Хрыстус! З надыходзямым святам Божага Нараджэння», — дадае генеральны камісар каталіцкіх скаўтаў у Беларусі Павел Бельскі.

Распаўсюджанне Бэтлеемскага агню будзе доўжыцца да 23 снежня.

Абноўлена 21.12.2017 14:08
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання
. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Дух хоча жыць у нас –
мы пакліканы да вечнага жыцця