13 чэрвеня, у дзень успаміну святога Антонія Падуанскага, адбудзецца пешая пілігрымка да адной з найбольш значных святынь Навагрудчыны — даўняй драўлянай капліцы ў вёсцы Мількавічы, асвечанай у гонар гэтага вялікага францішканскага святога.
У Год святога Францішка Асізскага пераадолець гэты невялікі 7-кіламетровы шлях запрашаюцца вернікі з усёй Беларусі, каб, як кажуць арганізатары пілігрымкі, «у малітве прайсці маляўнічымі ваколіцамі Навагрудскага краю, адчуць дух еднасці і сапраўднай жывой веры».
Сцвярджаецца, што «старадаўняя драўляная капліца, прыцягвае сваёй прастатой і асаблівым малітоўным духам».
Расклад пілігрымкі:
- 9.00 — урачысты выхад пешай пілігрымкі ад касцёла святога Арханёла Міхаіла ў Навагрудку. Перад выхадам — кароткая малітва і благаслаўленне пілігрымаў.
- 11.30 — ад'езд аўтобуса ад касцёла для тых, хто па стане здароўя ці іншых прычынах не можа далучыцца да пешага шляху, але прагне быць на святой Імшы.
- 12.30 — урачыстая святая Імша ў капліцы святога Антонія Падуанскага ў Мількавічах. Падчас літургіі будзе магчымасць памаліцца праз заступніцтва святога Антонія ў асабістых просьбах, а таксама папрасіць благаслаўлення для сваіх сем'яў і ўсёй Беларусі.
Арганізатары шчыра запрашаюць далучыцца да гэтай падзеі вернікаў з усіх куткоў Беларусі.
«Няхай гэты дзень стане для нас часам духоўнага абнаўлення, братэрскіх сустрэч і ўмацавання нашай супольнай веры. Вазьміце з сабой добрае надвор'е ў сэрцы, зручны абутак і малітоўны настрой»,
— заклікаюць яны, заканчваючы малітоўным заклікам «Святы Антоній Падуанскі, маліся за нас!»
