Традыцыйны Фэст святога Андрэя Баболі адбудзецца сёлета 16 мая ў дзень дыяцэзіяльнай урачыстасці прысвечанай гэтаму нябеснаму заступніку Палесся і Пінскай дыяцэзіі.
Фэст у Іванаве традыцыйна распачнецца ў 11.00 з малітоўнай працэсіі ад «Крыжоў Адзінства» (вул. Леніна) да парафіяльнага касцёла (цэнтральная гарадская плошча) па шляху мучаніцтва святога Андрэя.
Пасля завяршэння працэсіі, у 12.00 ў касцёле-санктуарыі адбудзецца святая Імша з удзелам духавенства, шматлікіх вернікаў і пілігрымаў.
На заканчэнне літургіі ўсе пілігрымы будуць мець магчымасць асабіста памаліцца і ўшанаваць рэліквіі святога Андрэя Баболі, якія з даўніх часоў захоўваюцца ў іванаўскім касцёле Узвышэння Святога Крыжа. Таксама многія наведвальнікі санктуарыя заўсёды моляцца пры старадаўнім крыжы каля алтара, які быў уласнаручна выкананы знакамітым майстрам Напалеонам Ордам — іванаўскім парафіянінам і вялікім шанавальнікам святога Андрэя Баболі.
