У сераду 3 красавіка ў Хрысціянскім сацыяльным цэнтры пры Дабрачыннай місіі Добрага Самараніна ў Мінску адкрыецца выстава, прысвечаная выдатным асобам беларускага Касцёла.
На выставе «З Богам для Беларусі. Пра ахвярнае служэнне святароў у першай палове ХХ стагоддзя» ў цэнтры ўвагі будуць такія асобы, як Адам Станкевіч, Казімір Сваяк (Канстанцін Стаповіч), Андрэй Зязюля (Аляксандр Астрамовіч), Чэслаў Сіповіч, Язэп Германовіч і многія іншыя. Таксама ў экспазіцыйнай прасторы будуць прадстаўлены некаторыя святары іншых хрысціянскіх канфесій.
Шматлікія рарытэты, якія можна будзе ўбачыць на выставе, з’яўляюцца навочным сведчаннем таго, у якіх няпростых умовах неслі сваё душпастырскае служэнне тыя, хто прысвяціў сябе Богу і Айчыне.
Вось што пісаў у адным са сваіх вершаў святар і паэт Андрэй Зязюля (ксёндз Аляксандр Астрамовіч):
І хоць мой пуць шыпчыннікі укрылі
І цернь калючы чуць пад кволаю нагой,
Усё ж дух мой ўздымаецца на крыллі
І рвецца ў даль усцяж да Ідэі святой.
Адкрыццё выставы адбудзецца 3 красавіка.
Пачатак мерапрыемства а 18-й гадзіне.
Арганізатары выставы запрашаюць на яе ўсіх ахвотных.
Адрас: Хрысціянскі сацыяльны цэнтр, вул. Серафімовіча, 19.
