У суботу 11 лютага, у Сусветны дзень хворага, у Хрысціянскім сацыяльным цэнтры ў Мінску адбудзецца адмысловая цэлебрацы святой Імшы з удзяленнем пажылым і нямоглым сакрамэнту хворых.
Сусветны дзень хворага ў Каталіцкім Касцёле адзначаецца 11 лютага, ва ўспамін Маці Божай Люрдскай, па ініцыятыве святога Яна Паўла ІІ. Гэты дзень нагадвае пра абавязак належнай апекі над хворымі, пра ўсведамленне каштоўнасці цярпення хворых у чалавечым і духоўным вымярэнні. Вернік, сілы якога значна аслаблі па прычыне хваробы або старасці і якому з-за гэтага пагражае смерць, можа прыняць сакрамэнт намашчэння хворых. Кожны, хто годна яго прымае, атрымлівае спакой, узмацненне і мужнасць, каб па-хрысціянску прымаць цярпенні і хваробы.
Пачатак Імшы а 12-й гадзіне. Пасля цэлебрацыі ў Цэнтры адбудзецца музычная праграма і пачастунак.
Тэма сёлетняга паслання Святога Айца Папы Францішка на 31-ы Сусветны дзень хворага — «Паклапаціся пра яго. Спачуванне як сінадальнае практыкаванне аздараўлення». Пантыфік заклікае ставіць хворых у цэнтр увагі, каб па-сапраўднаму быць супольнасцю, якая ідзе разам. Ён заахвочвае наследаваць прыклад Добрага Самараніна, які злітаваўся над збітым і абрабаваным чалавекам, што ляжаў на ўзбочыне дарогі, не прайшоў міма, а дапамог яму.
Хрысціянскі сацыяльны цэнтр у Мінску дзейнічае пры Місіі Добрага Самараніна, галоўнай задачай супрацоўнікаў якой з’яўляецца дапамагаць і быць побач з тымі, хто пакутуе, чакае дапамогі і падтрымкі.
