У суботу 21 студзеня ў мінскім катэдральным касцёле Найсвяцейшага Імя Марыі ў межах Тыдня малітваў аб адзінстве хрысціянаў пройдзе экуменічнае набажэнства з удзелам прадстаўнікоў розных хрысціянскіх канфесій.
Малітву ўзначаліць Мітрапаліт Мінска-Магілёўскі арцыбіскуп Юзаф Станеўскі.
Пачатак у 19.15.
Экуменічнаму набажэнству ў галоўнай святыні Мінска-Магілёўскай архідыяцэзіі будзе папярэднічаць святая Імша ў інтэнцыі адзінства хрысціянаў, якая распачнецца ў 18.30.
Прамая трансляцыя святой Імшы і экуменічнага набажэнства будзе весціся на партале Catholic.by.
Традыцыйна Тыдзень малітваў аб адзінстве хрысціянаў праходзіць ва ўсім свеце з 18 па 25 студзеня. Тэмай сёлетняга экуменічнага тыдня сталі словы з кнігі прарока Ісаі: «Рабіце дабро, шукайце справядлівасці» (Іс 1, 17).
Выбар тэмы для Тыдня малітваў аб адзінстве хрысціянаў на 2023 год і падрыхтоўку матэрыялаў ажыццявіла група хрысціянаў са Злучаных Штатаў Амерыкі, скліканая Радай Цэркваў Мінэсоты і зацверджаная Сусветнай радай Цэркваў і Папскай радай спрыяння хрысціянскаму адзінству.
Члены рэдакцыйнай групы з Мінэсоты спадзяюцца, што іх асабісты досвед паслужыць сведчаннем пра пераадоленне прадузятасці і супрацоўніцтва вельмі розных супольнасцяў.
Падрыхтаваныя матэрыялы адлюстроўваюць моцнае жаданне, каб мы як хрысціяне ажыццяўлялі Божы дар адзінства, выкаранялі падзелы, якія перашкаджаюць нам зразумець і пазнаць той факт, што ўсе мы належым Хрысту.
Сімвал ракі (вады) мае вялікае культурнае значэнне для жыхароў Мінэсоты. Рака і вада сімвалізавалі адначасова жыццё і смерць — генацыд — у розныя моманты гісторыі насельніцтва гэтага рэгіёну.
Вада мае таксама тэалагічнае і літургічнае значэнне. Тыдзень малітваў аб адзінстве хрысціянаў у Паўночным паўшар’і адзначаецца ў студзені, неўзабаве пасля таго, як у многіх традыцыях згадваецца Хрост Пана.
Сімвалічнае і тэалагічнае значэнне мае таксама камень. Кінуты ў кагосьці, ён можа забіць, але яго таксама выкарыстоўваюць для пазначэння нейкага важнага месца, для ўвекавечвання пэўнай падзеі або для будоўлі. Мы самі з’яўляемся жывымі камянямі, які складаюць духоўны дом — Касцёл (пар. 1 П 2, 4).
Сувязь паміж каменем і вадою ў карэнных жыхароў Мінэсоты датычыцца каштоўнасці жыцця. Вада — гэта жыццё, а камяні сімвалізуюць святасць зямлі, па якой прайшло шмат пакаленняў. Падчас набажэнства будуць выкарыстаныя два гэтыя сімвалы: вада, якая азначае наш хрост, і камень, які звязаны з нашай гісторыяй.
