У нядзелю 24 ліпеня пры крыніцы святога Якуба, што ў вёсцы Тракелі на тэрыторыі парафіі Апекі Найсвяцейшай Панны Марыі ў Дайлідках (Астравецкі дэканат), адбудзецца адпустовая ўрачыстасць у 200-ю гадавіну з часу пабудовы тут першай капліцы.
- Урачыстую цэлебрацыю святой Імшы ўзначаліць Мітрапаліт Мінска-Магілёўскі арцыбіскуп Юзаф Станеўскі.
- Пачатак у 13.00.
- З нагоды ўспаміну святога Крыштафа пасля Імшы адбудзецца благаслаўленне кіроўцаў і транспартных сродкаў.
Крыніца святога Якуба — адзіная з такой назвай у Беларусі — з’яўляецца пачаткам шляху пілігрымкі з нашай краіны ў Сант’яга-дэ-Кампастэла, да рэліквій святога апостала Якуба.
Вада з крыніцы з даўніх часоў лічыцца гаючай.
У змрочныя савецкія часы ваяўнічага атэізму гэтае незвычайнае месца культу спрабавалі знішчыць, аднак жыватворчая вада Божай Праўды прабілася праз нагрувашчаныя завалы хлусні і насілля. Намаганнямі мясцовых вернікаў на чале з іх шматгадовым душпастырам ксяндзом Алегам Шпенем удалося расчысціць і аднавіць крыніцу каля вёскі Тракелі. Адшукаць адпаведныя дакументы пра «водную святыню» дапамог біскуп Гродзенскі Аляксандр Кашкевіч.
Пры крыніцы ў свята святога апостала Якуба традыцыйна адбываюцца адпустовыя ўрачыстасці. У 2014 годзе крыніцу наведаў біскуп Юзаф Станеўскі. У 2017 годзе адпустовую ўрачыстасць тут узначаліў біскуп Віцебскі Алег Буткевіч, а ў 2019 годзе — біскуп Юрый Касабуцкі.
Даехаць да крыніцы можна на асабістым транспарце. Даезд ад Дайлідак (з боку Астраўца ў бок Солаў) да вёскі Тракелі, дзе ёсць указальнікі да крыніцы Якуба.
Дайлідскія парафіяне на чале з пробашчам ксяндзом Алегам Шпенем шчыра запрашаюць усіх ахвотных узяць удзел у супольнай малітве пры крыніцы. Будзе магчымасць набраць крынічнай вады ў свой посуд.
