У суботу 16 ліпеня ў Клюшчанах, што на Астравеччыне, адбудзецца пасвячэнне новай святыні, размешчанай у былой плябаніі, замест знішчанага пажарам у 2017 годзе касцёла святога Яўхіма.
Клюшчаны — невялічкая вёсачка даўняга Віленскага краю, на самым беларска-літоўскім памежжы, славутая тым, што з мясцовай парафіі паходзіў і пэўны час нёс тут служэнне святар і паэт Канстанцін Стаповіч (Казімір Сваяк).
Касцёл, у якім ён калісьці служыў, быў цалкам знішчаны пажарам пяць гадоў таму, у ноч на 6 чэрвеня 2017 года. У святыні па нядзелях і святах збіраліся вернікі з больш чым дзесяці навакольных вёсак. З таго часу яны разам са сваім пробашчам ксяндзом Анатолем Захарэўскім абсталявалі новы касцёльчык, які размясціўся ў перабудаваным будынку былой плябаніі.
Пасвячэнне новага касцёла ў Клюшчанах здзейсніць арцыбіскуп эмэрыт Тадэвуш Кандрусевіч.
Пачатак а 11-й гадзіне.
Пробашч парафіі святога Яўхіма ў Клюшчанах ксёндз Анатоль Захарэўскі ад імя мясцовых вернікаў сардэчна запрашае ўсіх ахвотных узяць удзел ва ўрачыстасці пасвячэння касцёла, якое здзейсніць заслужаны беларускі іерарх.
З гісторыі касцёла ў Клюшчанах
- 1785 год — заснаванне першага касцёла пад тытулам святога Яўхіма Каламбрыйскага. Фундатар — Ян Корсак.
- 1844 год — пашырэнне святыні і змена тытула касцёла на святога Яўхіма, бацькі Найсвяцейшай Панны Марыі.
- 1887 год — рэканструкцыя і перабудова касцёла пад кіраўніцтвам ксяндза Яна Галіча-Сулінскага.
- 1904–1905гг. — узвядзенне на франтоне касцёла дзвюх вежаў у гатычна-закапанскім стылі і пераабсталяванне трох алтароў пад кіраўніцтвам ксяндза Юзафа Бародзіча.
- кастрычнік 1948 года — апошняя святая Імша перад закрыццём касцёла савецкай уладай. Цэлебраваў ксёндз Адам Вайцяхоўскі.
- 27 жніўня 1989 года — касцёл вернуты вернікам, у тым жа годзе адрамантаваны сіламі і на ахвяраванні парафіянаў.
- 1993 год — адноўлены інтэр’ер пад кіраўніцтвам айца Паўла Леліты ОСD.
- 2014–2015 гады — касцёл адноўны звонку і ўсярэдзіне пад кіраўніцтвам ксяндза Анатоля Захарэўскага.
- 6 чэрвеня 2017 года — будынак касцёла цалкам знішчаны пажарам.
