20 сакавіка, у Трэцюю нядзелю Вялікага посту, Мітрапаліт Мінска-Магілёўскі арцыбіскуп Юзаф Станеўскі ў касцёле святога Сымона і святой Алены ў Мінску (Чырвоны касцёл) узначаліць цэлебрацыю святой Імшы ў інтэнцыі міру ва Украіне.
Да трывалай малітвы за мір заклікае ўсіх вернікаў Каталіцкага Касцёла Папа Францішак. Падчас малітвы «Анёл Панскі» ў мінулую нядзелю Святы Айцец сказаў:
«Я прашу ўсе дыяцэзіяльныя і манаскія супольнасці узмацніць малітву за мір. Бог з’яўляецца Богам міру, а не вайны». Папа запрашае да малітвы за тых, хто пакутуе, і за тых, хто развязаў і падтрымлівае вайну, «каб Бог навярнуў іх сэрцы да цвёрдай волі да міру».
Адказваючы на заклік пастыра паўсюднага Касцёла, арцыбіскуп Станеўскі будзе цэлебраваць Імшу за мір у Чырвоным касцёле.
Пачатак у 11.00.
Пробашч парафіі святога Сымона і святой Алены ксёндз канонік Уладзіслаў Завальнюк запрашае ўсіх ахвотных да супольнай малітвы ў святыні і з дапамогай прамой трансляцыі на партале Catholic.by.
