У пятніцу 21 мая ў касцёле святога Зыгмунта ў Баранавічах (вул. Энтузіястаў, 51) памоляцца за лётчыкаў, якія загінулі 19 мая ў выніку крушэння вайсковага самалёта Лідскай штурмавой авіябазы Як-130 непадалёк ад гэтага касцёла.
Парафіяльная супольнасць і ўсе прысутныя будуць маліцца за загінулых лётчыкаў, а таксама да Божага Провіду аб захаванні жыхароў горада ад усялякіх небяспекаў, просячы Божай апекі і благаслаўлення для ўсіх.
Цэлебрацыя святой Імшы распачнецца ў 18.00.
Як гаворыцца ў паведамленні Прэс-службы Мінабароны, падчас «вучэбна-трэніровачнага палёту экіпаж выявіў тэхнічную няспраўнасць». Маёр Андрэй Нічыпарчык і лейтэнант Мікіта Куканенка імкнуліся адвесці «самалёт ад населенага пункта». Лётчыкі катапультаваліся пасля таго, як пераканаліся, што «траекторыя падзення самалёта знаходзіцца па-за жылымі дамамі», аднак абодва загінулі.
