З нагоды 425-й гадавіны зацвярджэння Берасцейскай царкоўнай уніі Папам Клімэнтам VIII у мінскай грэка-каталіцкай супольнасці пройдзе адмысловае набажэнства.
425 гадоў таму, 23 снежня 1595 г., у Рыме прадстаўнікі епіскапату праваслаўнай Кіева-Літоўскай Мітраполіі Канстанцінопальскага Патрыярхату біскуп Іпацій Пацей і біскуп Кірыла Цярлецкі былі прыняты ў святочнай атмасферы Папам Клімэнтам VIII.
Перад ім яны далі ўрачыстае Вызнанне веры і прысягнулі Папу — за сябе і за іншых — на вечнае злучэнне Усходняй Царквы Рэчы Паспалітай з Каталіцкай Царквой пад уладай Апостальскага Пасаду ў Рыме.
У той жа дзень Папа выдаў булу Magnus Dominus et laudabilis nimis — «Вялікі Пан і вельмі ўслаўлены», — якой зацвердзіў унію Рускай Царквы з Паўсюднай Царквой. Унія была прынята і абвешчана на Сінодзе ў Берасці (сучасны Брэст), які праходзіў 16–18 кастрычніка 1596 г. 23 снежня 2020 г. у Беларускай Грэка-Каталіцкай Царкве — гэта дзень падзячнай малітвы.
У Мінску падзячная Боская Літургія служыцца ў храме Душпастырскага цэнтра святога Язэпа (вул. Арджанікідзэ, д. 6) у 18.30.
