![](/3/images/news/2021/11/2021-11-18-1637242832_img_1528.jpg)
Святкаванне 425-годдзя Берасцейскай царкоўнай Уніі — аднаўлення еднасці Усходняй Царквы на беларускіх і ўкраінскіх землях з Рымскім Апостальскім Пасадам — гэта ўспамін і асэнсаванне шляху даўжынёю ў 425 гадоў, на працягу якіх рыма-католікі і грэка-католікі сумесна абвяшчалі Хрыстовае Евангелле.
Як паведамляе сайт мінскай грэка-каталіцкай парафіі святога праведнага Язэпа Svjazep.org, у складаных умовах пандэміі святкаванне ў Беларускай Грэка-Каталіцкай Царкве мае рэгіянальны характар і праходзіць этапамі.
13–14 лістапада юбілейныя ўрачыстасці адбываліся ў грэка-каталіцкіх парафіях Усходняга дэканата БГКЦ: Віцебска, Полацка і Магілёва.
Грэка-каталіцкія парафіі горада Віцебска (Уваскрасення Хрыстовага і Хрыста Збаўцы) святкавалі ў суботу, 13 лістапада. Тут адбылася Боская Літургія, цэлебрацыю якой узначаліў біскуп Віцебскі Алег Буткевіч у саслужэнні Апостальскага візітатара для беларускіх грэка-католікаў архімандрыта Сяргея Гаека і духавенства дэканата.
У прамоўленай гаміліі біскуп Буткевіч звярнуў увагу на неабходнасць мужнай веры ў любых умовах жыцця хрысціянаў.
Архімандрыт Гаек падзякаваў протапрэзбітэру Зміцеру Грышану, а таксама душпастырам Аляксандру Шаўцову з Полацка, Васілю Ягораву з Магілёва і Аляксею Варанко з Віцебска за іх руплівае служэнне вернікам. Словы падзякі Апостальскі візітатар скіраваў і вернікам за іх вернасць адзінай, святой, паўсюднай і апостальскай Царкве.
З нагоды юбілею дыяканы Вячаслаў Гарчакоў і Багдан Сунак былі ўзведзены ў ранг протадыяканаў.
У нядзелю 14 лістапада полацкая грэка-каталіцкая парафія святкавала парафіяльнае свята святамучаніка Язафата.
Святочную Боскую Літургію служылі айцец Васіль Ягораў з Магілёва, айцец Аляксей Варанко з Віцебска і полацкі настаяцель айцец Аляксандр Шаўцоў. Казанне прамовіў айцец Васіль, дыяканскае служэнне здзяйсняў протадыякан Багдан Сунак з Віцебска. Супольная малітва стала ўмацаваннем веры, а «салодкі стол», які пасля малітвы сабраў удзельнікаў на сумесны пасілак, стаў знакам духоўнай сувязі парафіянаў і гасцей свята.
У тую ж нядзелю, 14 лістапада, Апостальскі візітатар наведаў грэка-каталіцкую парафію Маці Божай Бялыніцкай ў Магілёве, дзе ў парафіяльным храме ў саслужэнні протадыякана Вячаслава Гарчакова ўзначаліў цэлебрацыю ўрачыстай Боскай Літургіі з нагоды юбілею і на ўспамін святкаванняў, якія адбыліся 25 гадоў таму з удзелам тагачаснага Прэфекта Кангрэгацыі Усходніх Цэркваў кардынала Акіле Сільвэстрыні.
Архімандрыт Гаек узгадаў крыжовы шлях экзарха мучаніка Антона Неманцэвіча, якога 80 гадоў таму ў лістападзе 1941 года Папа Пій ХІІ прызначыў Апостальскім адміністратарам для беларускіх грэка-католікаў.
![](https://catholic.by/3/templates/catholic/img/left.png)
![](https://catholic.by/3/templates/catholic/img/right.png)
![](https://catholic.by/3/templates/catholic/img/close.png)
![](https://catholic.by/3/templates/catholic/img/close.png)