28 кастрычніка, калі ў Касцёле адзначаецца свята святых апосталаў Сымона і Юды Тадэвуша, у мінскім катэдральным касцёле Найсвяцейшага Імя Марыі будзе цэлебравацца святая Імша ў інтэнцыі арцыбіскупа Тадэвуша Кандрусевіча з нагоды яго імянінаў, якія ён сёлета вымушаны адзначаць у выгнанні.
Да імянінаў Мінска-Магілёўскага Мітрапаліта вернікі Касцёла ў Беларусі зрабілі яму духоўны падарунак, ахвяраваўшы ў інтэнцыі яго хутчэйшага вяртання на радзіму малітоўную навэнну да святога Юды Тадэвуша.
У свята нябеснага апекуна Старшыні Канферэнцыі Каталіцкіх Біскупаў у Беларусі вернікі збяруцца на святую Імшу ў галоўнай святыні Мінска-Магілёўскай архідыяцэзіі, дзе з захаваннем санітарна-эпідэміялагічных прадпісанняў будзе цэлебравацца святая Імша ў інтэнцыі арцыбіскупа Тадэвуша Кандрусевіча.
Пачатак цэлебрацыі ў 18.30.
Тыя, хто не можа прысутнічаць на Імшы ў касцёле, маюць магчымасць духоўна далучыцца да супольнай малітвы з дапамогай прамой трансляцыі на партале Catholic.by.
