10 верасня фігура святога Міхала Арханёла, галоўнага нябеснага апекуна Каталіцкага Касцёла ў Беларусі, прыбудзе ў Пінск.
Перэгрынацыя распачалася з Гродна і праходзіць у чатырох катэдральных касцёлах усіх дыяцэзій на Беларусі з малітвай у інтэнцыі міру ў нашай краіне і аб хутчэйшым вяртанні на Радзіму арцыбіскупа Тадэвуша Кандрусевіча.
Фігура Арханёла Міхала, якая перэгрынуе па Беларусі, з’яўляецца копіяй фігуры з горнага масіву Гаргана ў Італіі — самага знакамітага месца аб’яўленняў Князя войскаў нябесных. Сёння там знаходзіцца санктуарый — адзіная святыня, якая не была асвячана рукою чалавека, бо гэта зрабіў сам Арханёл.
Урачыстае ўнясенне фігуры святога Міхала Арханёла ў Пінскую катэдру адбудзецца 10 верасня ў 17.45.
Перэгрынацыя распачнецца Адарацыяй Найсвяцейшага Сакрамэнту і святой Імшой.
Наведаць катэдральную святыню і памаліцца перад фігурай праз заступніцтва святога Міхала можна будзе да 16 верасня. У гэты дзень пасля святой Імшы ў 9.00 фігура будзе перавезена ў катэдру ў Віцебск.
