23 жніўня ў рэктаральным касцёле Звеставання Найсвяцейшай Панне Марыі ў Гродне (пабрыгіцкі) адбудзецца адкрыццё адноўленага галоўнага алтара.
Пра гэта паведамляе партал Grodnensis.by.
Гэты касцёл належыць да найстарэйшых з захаваных у Гродне. Усе алтары ў ім былі знішчаны ў 1950-я гады, калі святыню прыстасавалі пад склад.
30 гадоў таму касцёл вярнулі вернікам. За ўвесь час, што яго выкарыстоўвалі ў якасці складу, у ім знішчылі ўсё ўнутранае аздабленне.
Касцёл асвяцілі і зрабілі рамонт, але алтароў у ім не было да гэтага часу. Пра іх выгляд можна меркаваць толькі па старых фотаздымках інтэр’ераў святыні. Часткова захаваліся толькі фрагменты алтароў.
Аднаўляць галоўны алтар касцёла, які быў зроблены ў XVII ст. з чорнага дрэва, пачалі ў верасні 2019 года.
Цяпер яго зрабілі з каменных блокаў, пакрытых венецыянскім мармурам.
Праграма ўрачыстасці
- 11.00 — мультымедыйная прэзентацыя «Алтар у касцёле Звеставання Найсвяцейшай Панне Марыі ў Гродне — мінулае і сённяшняе»
- 12.00 — святая Імша і асвячэнне алтара
- 13.30 — канцэрт моладзевага ансамблю Open і свята ва ўнутраным дворыку брыгіцкага кляштара
- Пасля 14.00 — магчымасць наведаць музейную экспазіцыю ў залах пад касцёлам з мясцовым экскурсаводам.
Да ўдзелу ва ўрачыстасці запрашае ўсіх жадаючых рэктар касцёла кс. канонік Антоні Грэмза.
