З 8 па 10 студзеня ў Вышэйшай духоўнай семінарыі імя св. Тамаша Аквінскага ў Пінску адбудзецца калядная сустрэча для міністрантаў і юнакоў, якія разважаюць пра сваё пакліканне.
Праграма сустрэчы плануецца насычанай і багатай на разнастайныя пазнавальныя і забаўляльныя заняткі. Міністрантаў чакаюць практыкаванні па літургіцы і асаблівасцях службы пры алтары падчас розных урачыстасцяў. Абавязковым элементам сустрэчы будуць таксама спартыўныя спаборніцтвы.
Для юнакоў, якія жадаюць заглыбіцца ў разуменне паклікання, запланавана адмысловая духоўная праграма, якая дасць ім магчымасць сустрэцца з Божым Словам на малітве, адарацыі, святой Імшы. Таксама будзе час на размову са святарамі і семінарыстамі.
У сувязі са святамі Божага Нараджэння семінарысты абяцаюць падрыхтаваць для ўдзельнікаў спецыяльны калядны сюрпрыз.
Сустрэча распачнецца 8 студзеня ў 13.00 і скончыцца 10 студзеня ў 14.00.
З сабой неабходна мець нататнік, ручку, комжу і спартыўную вопратку.
Жадаючых узяць удзел у сустрэчы арганізатары просяць загадзя паведаміць па тэлефоне:
+375 29 240 67 38 — кс. Юрый Пракапюк
