16 лістапада, ва ўрачыстасць Найсвяцейшай Панны Марыі Маці Міласэрнасці Вастрабрамскай, калі ў Вільні праходзяць традыцыйныя Апекі, у касцёле святой Тэрэзы адбудзецца святая Імша па-беларуску.
Узначаліць цэлебрацыю ў святыні пры Вострай Браме Мітрапаліт Мінска-Магілёўскі арцыбіскуп Тадэвуш Кандрусевіч, які менавіта з гэтай віленскай парафіі распачаў сваё святарскае служэнне.
Пачатак у 15.00 — гадзіну Божай Міласэрнасці.
Арцыпастыр сёлета адзначае 30-годдзе свайго біскупскага служэння і шчыра запрашае пілігрымаў з Беларусі і беларусаў, якія жывуць у Вільні, узяць удзел у святой Імшы на роднай мове.
У нядзелю 17 лістапада адбудуцца заключныя набажэнствы, якімі завершацца сёлетнія ўрачыстасці Апекаў Маці Божай Вастрабрамскай.
Падчас святой Імшы з удзелам іерархаў, якая ў 13.00 будзе цэлебравацца ў Вастрабрамскай капліцы пры адчыненым вакне перад цудадзейным абразом, гамілію прамовіць арцыбіскуп Тадэвуш Кандрусевіч.
