У кожную першую суботу месяца ў санктуарыі Маці Божай Валадаркі Азёраў у Браславе адбываюцца спецыяльныя набажэнствы, спалучаныя з адарацыяй Найсвяцейшага Сакрамэнту і святой Імшой ў інтэнцыі падзякаў і просьбаў вернікаў.
Сувязь з Марыяй — гэта прыкмета сапраўднай хрысціянскай пабожнасці, вельмі важная ў духоўным жыцці. Марыя — гэта надзейны і выпрабаваны шлях да Хрыста, ідучы па якім мноства жанчын і мужчын дасягнулі святасці. Сваім узорам і заступніцтвам Багародзіца вядзе да свайго Сына кожнага, хто аддаецца Яе Матчынай абароне.
Словы Езуса Хрыста, сказаныя Ім з крыжа святому Яну: «Вось Маці твая», насамрэч адносяцца да кожнага Яго вучня і вучаніцы. Каб выканаць гэты запавет Сына Чалавечага, мы павінны прыняць Марыю да сябе, гэта значыць увесці яе ў духоўную прастору свайго жыцця.
З даверам звяртаючыся да Марыі, поўнай ласкі, мы верым, што Яна нас навучыць рабіць усё, што кажа Яе Сын, і такім чынам атрымаць усе патрэбныя для збаўлення ласкі. Марыя як Маці заўсёды побач, гатовая ў любую хвіліну падтрымаць сваіх дзяцей, абараніць іх ад зла, што пагражае душы і целу, даць сілу перанесці выпрабаванні.
Марыйныя санктуарыі — гэта месцы, дзе штодзённа ўжо шмат стагоддзяў адбываюцца і вялікія, і непрыкметныя цуды, духоўныя і цялесныя аздараўленні. З розных куткоў сцякаюцца ў іх пілігрымы, каб занесці да Нябеснай Матулі просьбы сваіх сэрцаў. У кожнай патрэбе мы можам прыйсці да нашай Маці і перад Яе цудадзейнай выявай прасіць аб дапамозе, апецы, парадзе ў цяжкіх справах, а Яна заўсёды выслухае і дапаможа.
Спецыяльныя набажэнствы ў інтэнцыі падзякаў і просьбаў вернікаў адбываюцца ў браслаўскім санктуарыі Маці Божай Валадаркі Азёраў кожную першую суботу месяца ў 11.00.
Падчас гэтых набажэнстваў, спалучаных з адарацыяй Найсвяцейшага Сакрамэнту і святой Імшой, перад цудатворнай іконай Маці Божай Браслаўскай зачытваюцца ўсе скіраваныя да Марыі падзякі і просьбы вернікаў.
Іх можна падаць непасрэдна ў санктуарыі або даслаць па пошце ці на інтэрнэт-старонку санктуарыя Маці Божай Валадаркі Азёраў Waladarka.by.
Адрас санктуарыя:
Санктуарый Маці Божай Валадаркі Азёраў
вул. Савецкая, 1
211969 г. Браслаў
БЕЛАРУСЬ
