16 ліпеня Ордэн Кармэлітаў Босых адзначае галоўную ўрачыстасць Маці Божай з гары Кармэль. Айцы кармэліты босыя з Мінска запрашаюць на ўрачыстасць, якая адбудзецца ў парафіі Божага Цела па вул. Герасіменкі, 6/1, пачатак у 19.00.
Адпустовую св. Імшу ўзначаліць Апостальскі нунцый у Беларусі арцыбіскуп Габар Пінтэр. Падчас яе іерарх удзеліць сакрамэнт хросту дваім дарослым парафіянам.
Пасля Імшы будзе магчымасць атрымаць святы шкаплер з рук айцоў кармэлітаў.
Гісторыя шкаплера паходзіць з ХІІІ стагоддзя. На гары Кармэль у Палестыне існаваў закон, члены якога, духоўныя сыны прарока Іллі, называлі сябе братамі Найсвяцейшай Панны Марыі. Іх габіт, зроблены з нефарбаванай шэрсці, складаўся з тунікі, падперазанай на сцёгнах скураным пасам, накінутага на туніку шкаплера і каптура. Кармэліты вялі жыццё, адданае малітве, працы і пакаянню, захоўваючы цноты чыстасці, убоства і паслухмянасці.
У канцы ХІІІ стагоддзя, у сувязі з пераследам з боку мусульманаў, рэлігійнымі войнамі з туркамі і заняпадам Касцёла на Святой Зямлі, законнікі былі вымушаныя выехаць у Еўропу.
Тут, у новым асяроддзі, перад малавядомым законам узнікла пагроза роспуску. У такім цяжкім становішчы пабожны генерал закону Сымон Сток просіць Марыю, каб Яна захавала прысвечаны Ёй закон.
У адказ на шчырую малітву Марыя аб’явілася святому Сымону ў ноч з 15 на 16 ліпеня 1251 года ў атачэнні анёлаў і, указваючы на яго шкаплер, учыніла яго знакам сваёй Матчынай апекі, сказаўшы: «Гэта будзе прывілей для цябе і для ўсіх кармэлітаў — хто ў ім памрэ, не зведае агню пякельнага».
Пасля таго аб’яўлення зніклі ўсе перашкоды і закон пачаў паступова развівацца ва ўсёй Еўропе. Праз 70 гадоў Маці Божая аб’явілася Святому Айцу Яну ХХІІ і, пацвярджаючы папярэднія прывілеі — асаблівую апеку ў зямным жыцці і выбаўленне ад агню пякельнага, — абяцала, што кожны, хто ў момант смерці будзе мець на сабе Яе шкаплер, у першую суботу пасля смерці будзе выведзены з чыстца ў неба.
