14 ліпеня ў Радашковічах пройдзе традыцыйны Купалаў фэст — рэлігійна-культурнае мерапрыемства на ўшанаванне памяці Янкі Купалы, ахрышчанага ў тутэйшым касцёле.
Традыцыя Купалава фэсту была распачатая ў Радашковічах па ініцыятыве каталіцкай моладзі і падтрыманая тагачасным пробашчам радашковіцкай парафіі Валянцінам Станкевічам і Дзяржаўным літаратурным музеем Янкі Купалы. Гэтае рэлігійна-культурнае мерапрыемства пашырыла праграму Купалаўскіх дзён, якія ладзяцца на ўспамін нараджэння і трагічнай гібелі паэта на яго радзіме ў Вязынцы і ў Мінску.
Янка Купала нарадзіўся ў далёкім 1882 годзе і быў ахрышчаны ў касцёле старадаўняга мястэчка Радашковічы, атрымаўшы імя ў гонар першага прарока Новага Запавету — святога Яна Хрысціцеля.
Паэтычныя і публіцыстычныя радкі Янкі Купалы жывілі ідэю беларускай дзяржаўнасці, што паўставала 100 гадоў таму ва ўмовах глабальных сацыяльных змен. Тады беларусы, як і многія народы Еўропы, імкнуліся заняць «свой пачэсны пасад між народамі». Дзеля гэтай мэты працавалі дзеячы беларускага руху незалежна ад сваіх палітычных поглядаў. І кожны з іх мог шчыра паўтарыць словы Янкі Купалы:
Беларусь — маё сэрца, залатая краіна…
ПРАГРАМА ФЭСТУ
- 10.00 — святая Імша ў касцёле Найсвяцейшай Тройцы
- Ігнат Данько. «Мая малітва» пад гукі старадаўняга аргана
- 11.20 — «Чытаем Купалу разам»: чытанне ўсімі жадаючымі рэлігійных і патрыятычных вершаў Янкі Купалы
- 12.20 — перапынак на гарбату
- 12.45 — канцэртная праграма: Алеся Сівохіна і Алесь Камоцкі
- 13.45 — MölkKUPALA: турнір па гульні мёльккю
- 14.45 — малітва на завяршэнне ў касцёле
Арганізатары фэсту парафія Найсвяцейшай Тройцы ў Радашковічах на чале з яе пробашчам кс. канонікам Юрыем Быкавым і Дзяржаўны літаратурны музей Янкі Купалы шчыра запрашаюць у Радашковічы ўсіх, хто любіць і шануе песняра Беларусі.
Касцёл Найсвяцейшай Тройцы, Радашковічы, вул. Бурдзенюка, 2.
