З 20 па 26 жніўня ў парафіі св. Яна Паўла ІІ у Смаргоні (Гродзенская дыяцэзія) праходзіць летнік для дзяцей і моладзі «Канікулы з Богам».
Летнік арганізаваў новапрызначаны пробашч парафіі кс. Яўген Учкуроніс, які з мінулага месяца нясе ў ёй служэнне. У правядзенні летніка пробашчу дапамагаюць с. Дарота з Гродна і парафіяльная моладзь.
Дзень у летніку распачынаецца ў капліцы. На 9.30 тут збіраюцца ўсе выхаванцы, каб падрыхтавацца да св. Імшы. Разам з с. Даротай яны развучаюць новыя спевы, якія спяваюць падчас літургіі. Імша, якую цэлебруе кс. Яўген, распачынаецца а 10-й гадзіне.
Пасля ранішняй малітвы дзеці і моладзь ідуць на стадыён у Заходнім мікрараёне. Там для іх падрыхтавана спартова-забаўляльная прграма. Акрамя таго, што выхаванцы летніку актыўна праводзяць час на свежым паветры, яны таксама гуляюць у настольныя гульні. Абавязковымі пунктамі ў парадку дня з’яўляецца сумесны прагляд фільмаў і, вядома, абед.
На заканчэнне летніка «Канікулы з Богам» для выхаванцаў прадугледжана экскурсія ў Мінск і нядзельны канцэрт, падрыхтаваны імі для сваіх родных і блізкіх у Цэнтры культуры.
