Госцем новага выпуску праекту «Апостал», які выходзіць на Youtube-канале PAX.TV, стаў заслужаны беларускі іерарх — арцыбіскуп эмэрыт Тадэвуш Кандрусевіч, які ў гэтым годзе адзначыў своё 80-годдзе. Чалавек-легенда, які ўнёс і працягвае ўносіць вялікі ўклад у развіццё Каталіцкага Касцёла ў Беларусі.
У гэтым выпуску, які доўжыцца больш за 3 гадзіны, гледачы ўбачаць шчырую размову і атрымаюць адказы на пытанні аб дзяцінстве дастойнага іерарха, родным касцёле ў Адэльску, адкрыцці семінарыі ў Гродна, што адбываецца з тытулам мітрапаліта, калі святар ідзе на пенсію, ці патрэбен святар у эпоху штучнага інтэлекту, у якім стане Касцёл у Беларусі сёння. Гэтымі і шматлікімі іншымі цікавымі момантамі свайго жыцця іерарх дзеліцца ў відэаінтэрв'ю.
PAX TV — гэта праект, які знаёміць аўдыторыю з духоўным і матэрыяльным светам. Яго заснавальнікам і вядучым з’яўляецца ксёндз канонік Юрый Санько — каталіцкі святар, пробашч касцёла Найсвяцейшай Тройцы (святога Роха) у Мінску.
«Апостал» — гэта маштабны цыкл дакументальных інтэрв’ю з ключавымі фігурамі Каталіцкага Касцёла ў Беларусі.
