Папа Леў XIV прывітаў членаў Федэрацыі каталіцкіх СМІ, удзельнікаў 29-й штогадовай сустрэчы, прымеркаванай да Дзён святога Францішка Сальскага, нябеснага апекуна каталіцкай прэсы.
Сустрэча на тэму «Якая адказнасць каталіцкіх медыя ў палярызаваным свеце?» праходзіць з 21 па 23 студзеня ў Люрдзе (Францыя). У праграме — моманты абмеркаванняў і малітвы, абмен вопытам, надзеямі і планамі.
Ад імя Святога Айца дзяржсакратар кардынал П'етра Паралін перадаў сардэчнае прывітанне ўдзельнікам сустрэчы, нагадваючы, што з пачатку пантыфікату Леў XIV кажа пра важнасць «непрадузятай і абяззбройваючай камунікацыі, якая дазваляе глядзець на свет без прадузятасці і з павагай да годнасці кожнага». Міру патрэбны словы, якія загойваюць раны, ствараюць адзінства там, дзе варожасць падзяляе людзей і народы. «Мы павінны сказаць рашучае "не" вайне вобразаў і слоў», — падкрэсліваецца ў пасланні.
«Перад тварам нашай эпохі, адзначанай уварваннем штучнага інтэлекту ў тым ліку і ў сферу камунікацыі, важна неадкладна вярнуцца да "довадаў сэрца", да цэнтральнай ролі добрых адносін і блізкасці да іншых, не выключаючы нікога. На гэты выклік каталіцкія медыі могуць адказаць служэннем праўдзе, прапануючы яе ўсім, нават няверуючым»,
— адзначыў пантыфік.
Прафесіяналы ў галіне сацыяльнай каталіцкай камунікацыі пакліканы быць «сейбітамі добрых слоў, узмацняльнікамі галасоў, якія смела шукаюць прымірэння», пазбаўляючы сэрцы ад нянавісці і фанатызму.
«У раздробненым і палярызаваным свеце будзьце “антэнамі”, якія ўлоўліваюць і перадаюць тое, чым жывуць людзі слабыя і адрынутыя, самотныя і тыя, хто прагне спазнаць радасць любові».
У гэтым імкненні крыніцай натхнення служыць айцец Жак Амель, у гонар якога Федэрацыя каталіцкіх СМІ заснавала прэмію для журналістаў, якія займаюцца прасоўваннем міру і міжрэлігійнага дыялогу.
«Айцец Амель быў сведкам веры аж да самаахвяравання. Ён заўсёды верыў у каштоўнасць дыялогу і цярплівага ўзаемнага слухання. Айцец Амель быў перакананы ў неабходнасці быць побач з кожным, без выключэнняў. Бо каб даведацца адзін пра аднаго, трэба сустракацца, не баючыся адрозненняў, быць гатовымі змагацца за тое, кім мы з'яўляемся і ў ва што верым. Няхай яго прыклад заахвоціць вас быць шукальнікамі ісціны ў любові, якая ўсё тлумачыць, творцамі слова, якое аб'ядноўвае, камунікацыі, здольнай уз'яднаць пабітае, бальзамам на раны чалавецтва», — сказаў Папа.
