20 ліпеня ў будынку Канферэнцыі Каталіцкіх Біскупаў у Беларусі ў Мінску адбыўся першы тур уступнага экзамену для кандыдатаў на першы год навучання ў Вышэйшых духоўных семінарыях у Гродне і Пінску.
Экзаменацыйныя пытанні датычыліся Катэхізісa Каталіцкага Касцёла, жыцця паўсюднага і мясцовага Касцёла, яго структуры з мэтай лепш ацаніць зацікаўленасць кандыдатаў тым, як жыве Касцёл.
Акрамя таго, кандыдатам трэба было растлумачыць матывы свайго выбару следаваць за Хрыстом, які кліча іх да працы ў Яго аўчарні ў якасці святароў.
Экзамен прымала экзаменацыйная камісія ў наступным складзе: старшыня — біскуп Аляксандр Яшэўскі SDB, старшыня Камісіі Канферэнцыі Каталіцкіх Біскупаў у Беларусі па справах фармацыі семінарыстаў і святароў; кс. Віталь Вайцяхоўскі, рэктар Міждыяцэзіяльнай вышэйшай духоўнай семінарыі ў Гродне; кс. Мікалай Ціхановіч, біскупскі вікарый Віцебскай дыяцэзіі, адказны за пакліканні ў дыяцэзіі; кс. Павел Эйсмант, куратар 1-га курса.
Пасля пісьмовай часткі экзамену кандыдаты сустрэліся з адным з членаў камісіі на кваліфікацыйнай размове.
Экзаменацыйная камісія, праінфармаваўшы пра сваё рашэнне дыяцэзіяльных біскупаў, з чыіх дыяцэзій паходзяць кандыдаты, і атрымаўшы іх благаслаўленне і згоду, паведамляе, што новымі студэнтамі Міждыяцэзіяльнай вышэйшай духоўнай семінарыі ў Гродне сталі:
- трое кандыдатаў з Гродзенскай дыяцэзіі, якія паходзяць з Гродна, Ліды і Жалудка;
- адзін кандыдат з Мінска-Магілёўскай архідыяцэзіі, які паходзіць з Магілёва;
- адзін кандыдат з Віцебскай дыяцэзіі, які паходзіць з Глыбокага.
Усе людзі добрай волі заахвочваюцца да малітвы ў інтэнцыі новых семінарыстаў, а таксама аб новых і святых пакліканнях да святарства.
