Святы Пасад крытычна паставіўся да недастатковага забеспячэння асноўнымі лекавымі сродкамі ў многіх краінах. У сістэмах аховы здароўя каля 90 дзяржаў людзі атрымоўваюць менш за палову патрэбных лекаў, паведаміў старшыня Папскай рады пастырства работнікаў сферы аховы здароўя арцыбіскуп Зігмунт Зімоўскі.

Па словах іерарха, у іх шэрагу знаходзяцца і некаторыя развітыя краіны, і палітычнае кіраўніцтва павінна забяспечыць, каб усе пласты насельніцтва атрымалі роўны доступ да медыцынскай дапамогі, “з асаблівым акцэнтам на найбольш уразлівых: дзяцей, пажылых, бедных і людзей, якія жывуць на краі грамадства”.

Арцыбіскуп Зімоўскі нагадаў заклік Папы Фрэнцішка падчас яго візіту да бежанцаў на італьянскі востраў Лампедуза ў 2013 г., каб палітыка мела на мэце не толькі гарантаванне грамадзянскіх правоў, але і імкнулася да забеспячэння доступу кожнага да базавых матэрыяльных умоў жыцця.

Каментарый ватыканскага іерарха прымеркаваны да “Дня збору лекаў”, які адзначаецца 8 лютага ў шэрагу еўрапейскіх краін. Ён можа стаць магчымасцю для адлюстравання духу справядлівасці, міласэрнасці і салідарнасці на карысць роўнага доступу да лячэння і лекаў ва ўсім свеце і для ўсіх сацыяльных груп, адзначыў арцыбіскуп Зімоўскі і падзякаваў фармацэўтам і вытворцам фармацэўтычнай прадукцыі, якія прынялі і прымуць удзел у гэтым дні, ахвяруючы медыкаменты.

Паводле беларускай рэдакцыі Ватыканскага радыё

(AG)