Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Святы Пасад нагадаў у ААН пра правы карэнных народаў
Рымская курыя
26.04.2017 11:16

Прадстаўнік Святога Пасаду прыняў удзел у дыскусіі, якая прайшла 24 красавіка ў штаб-кватэры ААН у Нью-Ёрку, прымеркаванай да дзясятай гадавіны Дэкларацыі аб правах карэнных народаў.

Арцыбіскуп Бернардзіта Ауса нагадаў, што два месяцы таму, Францішак сустрэўся ў Ватыкане з групай прадстаўнікоў карэнных народаў з розных частак свету і падкрэсліў два аспекты іх правоў: права на развіццё і права на самабытнасць.

Апостальская Сталіца лічыць, што для прасоўвання праўдзівага развіцця карэнных народаў, павінны быць узгоднены яго культурны, сацыяльны і эканамічны аспекты. Гэта актуальна пры планаванні гаспадарчай дзейнасці, якая можа канфліктаваць з культурай гэтых народаў і іх стаўленнем да зямлі і да прыроды. Гаворка ідзе як пра ўрадавыя ініцыятывы, так і праекты прыватнага сектара.

Карэнныя супольнасці — гэта не толькі адны з меншасцяў; яны павінны быць асноўнымі партнёрамі па дыялогу, калі буйныя праекты ўплываюць на іх спрадвечныя землі. Для гэтых людзей зямля з’яўляецца не таварам, а падарункам ад Бога і продкаў.

Тым не менш, у розных частках свету на іх аказваецца ціск, каб яны адмовіліся ад сваёй радзімы, каб вызвалілі месца для сельскагаспадарчых або горнарудных праектаў, якія ажыццяўляюцца са шкодай для прыроды і традыцый.

У сувязі з гэтым Апостальская Сталіца заклікала краіны да распрацоўкі нацыянальных стратэгій, якія закладаюць неабходнасць кансультацый з карэннымі народамі адносна праектаў развіцця як з важнай часткай супольнасці і поўнымі яе членамі.

Павага да самабытнасці карэнных народаў спрыяе клопату пра планету, бо іх традыцыі падкрэсліваюць важнае ўзаемадзеянне і ўзаемазалежнасць чалавечай асобы і прыроды. Яны таксама маюць павышанае пачуццё салідарнасці паміж пакаленнямі; адсюль клопат пра навакольнае асяроддзе ў інтарэсах сваіх дзяцей і ўнукаў. «У сувязі з гэтым карэнныя народы заслугоўваюць не толькі нашай павагі, але і нашай падзякі і падтрымкі», — завяршыў сваю прамову ў ААН пастаянны прадстаўнік Апостальскай Сталіцы.

Беларуская рэдакцыя Ватыканскага радыё

 

Пры выкарыстанні матэрыялаў сайта спасылка на Catholic.By абавязкова.