Прэзідэнт Венесуэлы Нікалас Мадура напісаў ліст папу Францішку, у якім просіць Святога Айца выступіць пасрэднікам ва ўрэгуляванні палітычнага крызісу ў яго краіне.
Пра гэта са спасылкай на дзяржаўнага сакратара Яго Святасці кардынала П’етро Параліна паведаміла 5 лютага Каталіцкае агенцтва навін CNA.
Напярэдадні Мадура сам распавёў пра сваю просьбу ў інтэрв’ю італьянскаму тэлебачанню. Ён просіць Папу дапамагчы на шляху дыялогу.
«Папа ведае, што я — практыкуючы католік. Я малюся хрысціянскімі малітвамі і ўдзельнічаю ў абрадах. У гэтым духу я папрасіў дапамогі», сказаў Нікалас Мадура ў інтэрв’ю Sky Tg24.
Варта адзначыць, што Святы Айцец не падтрымлівае ніводзін з бакоў у венесуэльскім крызісе. Падчас свайго вяртання з Панамы папа Францішак заўважыў, што для яго як для пастыра было б неразважліва стаць на той ці іншы бок у супрацьстаянні, якое сёння раскалола венесуэльскае грамадства і міжнародную супольнасць.
«У гэты момант я падтрымліваю ўвесь венесуэльскі народ. Гэты народ пакутуе як з аднаго, так і з другога боку. Усе людзі церпяць», — сказаў 28 студзеня Святы Айцец. Ён заклікаў да справядлівага і мірнага вырашэння канфлікту без праліцця крыві.
