8 студзеня на 89-м годзе жыцця адышоў у вечнасць дыпламат Святога Пасаду арцыбіскуп Герог Цур, які з 29 студзеня 2000 г. па 8 кастрычніка 2002 г. з’яўляўся Апостальскім нунцыем у Расійскай Федэрацыі. Падчас яго служэння былі адноўлены нармальныя структуры Касцёла ў гэтай краіне.
Арцыбіскуп Тадэвуш Кандрусевіч, які блізка ведаў спачылага, падзяліўся сваімі ўспамінамі пра яго з Catholic.by.
«Арцыбіскуп Георг Цур добра размаўляў па-руску, быў вельмі камунікабельным чалавекам, які шмат увагі прысвячаў развіццю пастырскай дзейнасці Каталіцкага Касцёла ў Расіі і ўмацаванню яго структур.
Менавіта падчас яго служэння ў Расіі св. Ян Павел ІІ аднавіў там нарамальныя касцёльныя структуры на ўзроўні дыяцэзій.
Служачы потым нунцыем у Аўстрыі, а пасля ўжо будучы на пенсіі, ён не пераставаў цікавіцца жыццём Касцёла ў Расіі і на Беларусі і падтрымліваў са мной кантакаты. Ён заўсёды дасылаў віншаванні на Божае Нараджэнне і на Вялікдзень. Я з ім сустракаўся і ў Рыме, дзе ён жыў.
Вечная памяць гэтаму іерарху, дыпламату і проста добраму чалавеку», — сказаў арцыбіскуп Кандрусевіч.
Арцыбіскуп Георг Цур нарадзіўся 15 лютага 1930 г. ў нямецкім горадзе Гёрліц. 10 кастрычніка 1955 г. прыняў прэзбітэрскае пасвячэнне і служыў у парафіях дыяцэзіі Бамберга (Германія). Пасля заканчэння Папскай дыпламатычнай акадэміі нёс служэнне ў Індыі, Мексіцы, Бурундзі і Угандзе. 5 лютага 1979 г. ён быў менаваны тытулярным арцыбіскупам Сэсты і прызначаны Апостальскім пра-нунцыем у Замбіі і Малаві. З 3 мая 1985 г. стаў Апостальскім нунцыем у Парагваі, а з 13 жніўня 1990 г. — у Індыі і Непале.
7 снежня 1998 г. арцыбіскуп Георг Цур узначаліў Папскую дыпламатычную акадэмію ў Рыме — галоўную навучальную ўстанову Святога Пасаду, якая рыхтуе спецыялістаў міжнароднай сферы.
