1 верасня ў Кошыцах (Славакія) адбылася беатыфікацыя мучаніцы Ганны Калясаравай — 16-гадовай дзяўчыны, якая ў 1944 г. загінула ад рукі савецкага салдата, баронячы сваё дзявоцтва.
Падчас нядзельнай малітвы «Анёл Панскі» папа Францішак звярнуў увагу на сведчанне новай славацкай благаслаўлёнай і выказаў пажаданне, каб яе прыклад і заступніцтва дапамагалі моладзі трываць у вернасці Евангеллю.
«Учора ў Кошыцах (Славакія) была абвешчана благаслаўлёнай Ганна Калясарава, забітая за супраціўленне чалавеку, які хацеў парушыць яе годнасць і чысціню.
Няхай гэтая адважная дзяўчына дапамагае маладым хрысціянам трываць ў вернасці Евангеллю, нават калі гэта патрабуе ад іх ісці супраць дамінуючых плыняў і плаціць за гэта ўласным жыццём», — сказаў Папа, заклікаючы да ўшанавання новай благаслаўлёнай.
