Папа Рымскі выказаў хваляванне ў сувязі з абвастрэннем сітуацыі на Святой Зямлі, дзе ў выніку супрацьстаяння паміж ізраільскімі вайскоўцамі і палестынскімі маніфестантамі ў апошнія дні, паводле паведамленняў палестынскіх крыніц, загінулі некалькі дзясяткаў пратэстуючых і каля трох тысяч атрымалі раненні.
З адмысловым заклікам Папа звярнуўся 16 мая падчас агульнай аўдыенцыі ў Ватыкане.
«Я вельмі занепакоены эскалацыяй напружанасці на Святой Зямлі і на Блізкім Усходзе, а таксама спіраллю насілля, якая ўсё больш аддаляе ад шляху міру, дыялогу і перамоў.
Выказваю мой глыбокі смутак аб загінулых і параненых і сваю блізкасць, з малітвай і любоўю, да ўсіх, хто пакутуе. Паўтараю, што выкарыстанне насілля ніколі не вядзе да міру.
Вайна выклікае вайну, насілле выклікае насілле. Заклікаю ўсе зацікаўленыя бакі і міжнародную супольнасць аднавіць высілкі, каб запанавалі дыялог, справядлівасць і мір», — сказаў Папа.
Абвастрэнне сітуацыі на Святой Зямлі пачалося 14 мая на фоне пераносу пасольства ЗША з Тэль-Авіва ў Іерусалім, што фактычна азначае прызнанне гэтага горада сталіцай Дзяржавы Ізраіль.
Акцыя палестынскага насельніцтва пачалася з самай раніцы на мяжы сектара Газа з Ізраілем. Ізраільскае войска падавіла пратэсты з выкарыстаннем зброі.
