Касцёл у Малдове адзначае 25-годдзе аднаўлення каталіцкіх структур. З гэтай нагоды біскуп Кішынёва Антон Коша прыняў удзел у 378-м пленарным пасяджэнні Канферэнцыі Каталіцкіх Біскупаў у Польшчы.
У 1993 годзе папа Ян Павел ІІ стварыў апостальскую адміністратуру Малдовы, якую ўзначаліў на той час 32-гадовы кс. Антон Коша з дыяцэзіі Ясы ў Румыніі.
У 2001 годзе яна была ператворана ў Кішынёўскую дыяцэзію, якая сёння ахоплівае ўсю тэрыторыю Малдовы.
«Перажываючы юбілей 25-годдзя аднаўлення структур Касцёла ў Малдове, маем надзею на ажыўленне нашай веры», — сказаў іерарх.
Паводле слоў біскупа, ужо тры гады ў Малдове не было ніводнага кандыдата ў святарства.
«Нядаўна ў нас з’явіліся два кандыдаты ў сталыя дыяканы, якія ўжо пачалі чатырохгадовую фармацыю ў духоўнай семінарыі ў Санкт-Пецярбургу. Такім чынам, там, дзе не хапае святароў, на дапамогу прыходзіць сталы дыякан, які можа правесці літургію слова. Мы павінны больш прывабным спосабам прадставіць маладым людзям пакліканне да кансэкраванага жыцця і да святарства».
- «Напалову святары» ці «напалову свецкія»? Ватыканскі іерарх — пра місію сталых дыяканаў
- У каларатцы, але жанаты: хто такія сталыя дыяканы?
Падчас пленарнага пасяджэння польскага епіскапату біскуп Коша папрасіў зацікаўленых святароў з Польшчы прыехаць для душпастырскага служэння ў Малдове, дзе вялікую частку католікаў складаюць палякі.
