30 лістапада на світанні ў Рым прыбудзе першая 25-асабовая група бежанцаў з Эфіопіі. У аэрапорце яе сустрэне генеральны сакратар епіскапату Італіі Нунцыа Галанціна і старшыня рымскай Супольнасці св. Эгідзія Марка Імпальяцы.
Яны абодва падпісалі нядаўна пагадненне з італьянскай дзяржавай, згодна з якім на працягу бліжэйшых двух гадоў пры дапамозе так званага «гуманітарнага калідора» з Эфіопіі ў Італію прыбудзе каля пяцісот бежанцаў.
Тыя з іх, што прыбудуць ў Рым у чацвер, знойдуць прытулак у сваіх родных, якія ўжо знаходзяцца ў сталіцы Італіі, а таксама ў дыяцэзіях Венцімілья паблізу Францыі і ў Рагусе на Сіцыліі. Мясцовыя парафіі забяспечаць іх жыллём, працоўнымі месцамі, а таксама дадуць магчымасць вывучаць італьянскую мову і адкрыюць доступ да медыцынскіх паслуг.
