Міністэрства навукі, вышэйшай адукацыі і навуковых даследаванняў Італіі разаслала ва ўсе школы «Каляндар дыялогу» — расклад святаў розных рэлігійных супольнасцяў, якія прадстаўлены ў гэтай краіне.
Каляндаром займалася спецыяльная камісія па справах плюралізму, свабоды і навукі рэлігіі ў школе, якую ўзначальвае гісторык Касцёла прафесар Альберто Мелоні з Балоньі.
Паводле яго слоў, «не так шмат дзён у годзе, калі няма чаго святкаваць ці згадваць».
Міністр навукі Валерыя Федэлі падкрэсліла, што «школа адкрытая для ўсіх і з’яўляецца месцам дыялогу і пашаны»:
«Мы мусім ведаць і ўмець адрозніваць святы розных рэлігійных груп, каб стаць крыніцай узаемнага ўзбагачэння і супольнага росту. Навука адыгрывае тут галоўную ролю, бо дае вучням інструментарый для пабудовы будучыні, свабоднай ад нянавісці і неталерантнасці».
Як адзначаецца, не толькі канкрэтныя школы, але нават і класы маюць поўную свабоду ў выбары святаў, якія знойдуць у календары Міністэрства, для іх святкавання.
