Урад Латвіі адобрыў выдзяленне 374 600 еўра на абнаўленне Цэнтра камунікацыі аглонскай базылікі з нагоды 100-годдзя латвійскай дзяржавы, якое будзе адзначацца ў 2018 годзе. Акрамя гэтага, Каталіцкі Касцёл у Латвіі мае надзею, што папа Францішак наведае базыліку ў жніўні 2018 г.
15 жніўня, ва ўрачыстасць Унебаўзяцця Найсвяцейшай Панны Марыі, у аглонскай базыліцы збіраюцца пілігрымы з усёй Латвіі і іншых краін.
Кусташ базылікі кс. Даўмантс Абрыцкіс патлумачыў, што пакуль няма інфармацыі пра магчымы візіт Пантыфіка ў Латвію, аднак, улічваючы той факт, што ён быў запрошаны на дзяржаўным узроўні, такую магчымасць выключаць нельга.
Прадстаўнік Інфармацыйнага цэнтра Рыма-Каталіцкага Касцёла ў Латвіі Інгрыда Пуцэ патлумачыла, што звычайна інфармацыя пра візіт Святога Айца з’яўляецца незадоўга да даты падарожжа.
У міністэрстве замежных спраў Латвіі пацвердзілі, што накіравалі запрашэнне папу Францішку, але пацвярджэння візіту Пантыфіка пакуль не атрымалі. Запрашаў Святога Айца таксама прэм’ер-міністр Латвіі Марыс Кучынскіс.
