Працэс беатыфікацыі славутага тэолага ХХ стагоддзя Рамано Гуардзіні распачнецца ў снежні 2017 года. Працы італьянскага святара, які амаль усё жыццё пражыў у Германіі, аказалі вялікі ўплыў на Бэнэдыкта XVI і папу Францішка.
Рамано Гуардзіні (1885-1968) лічыцца адным з самых вялікіх тэолагаў і рэлігійных філосафаў мінулага стагоддзя. Асаблівую ўвагу святар надаваў літургіі. На гэтую тэму ён напісаў кнігу «Дух літургіі» (1930).
Гуардзіні — адзін з самых вядомых прадстаўнікоў літургічнага руху, які зарадзіўся ў Францыі ў сярэдзіне XIX ст. і атрымаў развіццё ў Германіі пасля паражэння ў Першай сусветнай вайне. Адна з задач руху заключалася ў тым, каб паглыбіць разуменне літургіі — у тым ліку свецкімі. Літургічны рух аказаў вялікі ўплыў на літургічныя рэформы Другога Ватыканскага Сабору.
Ураджэнец Вероны Рамано Гуардзіні выкладаў у Берліне, Цюбінгіне і Мюнхене. У баварскай сталіцы адным з яго вучняў быў малады Ёзаф Ратцынгер. Падчас свайго Пантыфікату Бэнэдыкт XVI часта спасылаўся на працы свайго настаўніка і нават назваў адзін са сваіх твораў «Духам літургіі» — у знак блізкасці думак Гуардзіні з яго ўласнымі думкамі.
Хорхе Марыё Бергольё, у сваю чаргу, у 1986 годзе пачаў пісаць доктарскую дысертацыю, прысвечаную Гуардзіні, аднак па шэрагу прычын не змог скончыць гэтую працу. У той жа час некаторыя тэзісы Гуардзіні фігуруюць у наступных працах папы Францішка — у прыватнасці, у яго апостальскім звароце Evangelii Gaudium (2013).
Афіцыйнае адкрыццё працэсу беатыфікацыі тэолага адбудзецца 16 снежня ў Мюнхене.
