Група католікаў з Чылі праз сацыяльныя сеткі запусціла малітоўную акцыю «Мільён Ружанцаў за Папу» ў інтэнцыі запланаванага на студзень 2018 года візіту Святога Айца ў іх краіну.
Паводле слоў ініцыятараў, акцыя ружанцовых малітваў за Папу павінна ахапіць таксама іншыя інтэнцыі, у прыватнасці, якія датычаць веры, жыцця і сям’і. Гэта пытанні, асабліва актуальныя для Чылі сёння, бо не так даўно ў краіне былі легалізаваны аборты, а ў Нацыянальным кангрэсе працуюць над праектамі законаў адносна гендарнай палітыкі.
Малітоўная ініцыятыва спадабалася ўладам Касцёла ў гэтай паўднёваамерыканскай краіне. Адным з тых, хто падтрымаў акцыю, з’яўляецца арцыбіскуп Санцьяга і прымас Чылі кардынал Рыкардо Эсаці.
Візіт папы Францішка ў Чылі запланаваны на 15–18 студзеня 2018 г. Падарожжа будзе праходзіць пад дэвізам «Супакой Мой даю вам». Да гэтага ў 1987 г. Чылі наведваў св. Ян Павел ІІ.
