«Японскае грамадства сёння прагне сведчання хрысціянаў, якія змогуць ісці супраць плыні і давяраць Богу, які ніколі не падводзіць», — напісаў папа Францішак да біскупаў Японіі. У пасланні, скіраваным праз прэфекта Кангрэгацыі Евангелізацыі Народаў, які знаходзіцца з візітам у гэтай краіне, Пантыфік заклікае мясцовы Касцёл да ажыўлення місійнага духу.
Да такой паставы, як адзначаецца ў пасланні, іх павінен схіляць той факт, што яны з’яўляюцца спадкаемцамі мноства мучанікаў і вызнаўцаў, якія ва ўкрыцці захоўвалі веру ў Хрыста.
Святы Айцец піша пра актуальныя справы, якія робяць абвяшчэнне Евангелля яшчэ больш пільным заданнем. Гаворка ідзе пра сур’ёзныя праблемы, з якімі змагаецца японскае грамадства: шматлікія разводы і самазабойствы, у тым ліку сярод моладзі, духоўны фармалізм, маральны рэлятывізм, рэлігійная абыякавасць, неўтаймаванасць у сферы працы і заробкаў. «У гэтым кантэксце Касцёл у Японіі павінен нанова выказацца за місію Езуса, стаць соллю і святлом», — падкрэслівае Святы Айцец.
