Наступная сустрэча Пантыфіка і Патрыярха Маскоўскага будзе сюрпрызам, падобна таму, як неспадзяванай была іх сустрэча ў Гаване ў лютым 2016 года. Такую думку выказаў кардынал П’етро Паралін, які ў гэтыя дні — 21-24 жніўня — прабывае з візітам у Расіі.
У размове з Askanews Дзяржаўны Сакратар Яго Святасці сцвердзіў, што цяпер не вядзецца падрыхтоўка ні да такой сустрэчы, ні да візіту папы Францішка ў Маскву.
На пытанне пра тое, як Апостальская Сталіца хоча весці дыялог з Расіяй, кардынал адзначыў: «Цаглінамі, якімі мы хочам будаваць масты, з’яўляюцца перш за ўсё ўменне выслухоўваць меркаванне іншых, бо кожны дыялог нараджаецца з гатоўнасці да разумення; па-другое, уменне аб’ядноўваць агульныя інтарэсы ўсяго чалавецтва з партыкулярнымі інтарэсамі дадзенай краіны, якія не з’яўляюцца спрэчнымі; па-трэцяе, не аслабленне міжнароднага права, а яго захаванне».
На думку кардынала Параліна, Расія мае сваю ролю ў перамовах адносна вырашэння крызісу ў Венесуэле, і таму ватыканскі іерарх мае намер закрануць гэтую тэму падчас размовы з расійскімі ўладамі.
