![](/3/images/news/2017/08/2017-08-21-irkuck.jpg)
20 жніўня ў Іркуцку адбылася каранацыя фігуры Маці Божай Фацімскай. Урачыстую цырымонію ўскладання кароны ўзначаліў біскуп дыяцэзіі Святога Юзафа ў Іркуцку Кірыл Клімовіч.
Сярод прысутных быў таксама беларускі іерарх — біскуп Гродзенскай дыяцэзіі Аляксандр Кашкевіч, які звярнуўся да прысутных са сваім пастырскім словам.
Фігуру Божай Маці вырабіў скульптар з Кракава, аўтар унутранага інтэр’ера іркуцкай катэдры прафесар Вінцэнт Кучма. Карона да фігуры (таксама праца Вінцэнта Кучмы), выканана з пазалочанага срэбра і ўпрыгожана каштоўнымі і паўкаштоўнымі камянямі — нефрытам, лазурытам, аметыстам, смарагдам і жэмчугам. 15 гадоў таму ў Ватыкане яе асвяціў для іркуцкай святыні св. Ян Павел ІІ.
![](/3/images/news/2017/08/2017-08-21-irkuck1.jpg)
Польскі біскуп Ежы Мазур, пры якім была пабудавана іркуцкая катэдра, адзначыў, што Божая Маці заўсёды была заступніцай вернікаў сібірскіх каталіцкіх парафій: «Сёння важны дзень для ўсёй Сібіры. Божая Маці клапацілася і працягвае клапаціцца пра ўсіх, хто жыве на гэтай зямлі. Калі яны пакутавалі ў ГУЛАГах, калі іх каралі смерцю, — яна ва ўсе часы была з імі».
Святочная Імша, падчас якой прайшла каранацыя, завяршыла Пастырскую канферэнцыю «Услухоўваючыся ў Беззаганнае Сэрца Багародзіцы», што праходзіла ў дыяцэзіі Святога Юзафа ў Іркуцку 17-20 жніўня.