«Іслам перажывае вялікі працэс пералому і вялікі ўнутраны крызіс», — перакананы Мітрапаліт Вены кардынал Крыстаф Шонбарн. На думку іерарха, прычына гэтай сітуацыі ў глыбокім канфлікце паміж сунітамі і шыітамі.
Як паведаміў кардынал у размове з Radio Klassik Stephansdom 1 жніўня, гэты ўнутраны канфлікт паглынуў ужо шмат ахвяр сярод мусульманаў — больш, чым пацярпелі хрысціяне ад рук мусульманаў.
Галоўнымі праціўнікамі ў гэтай сутычцы з’яўляюцца Саудаўская Аравія, якую падтрымлівае ЗША, і Іран, які падтрымлівае Расія. У першай дзяржаве большасць складаюць суніты, у другой — пераважна шыіты.
«Калі гэты канфлікт будзе расці, можа дайсці да яго распаўсюджвання па ўсім ісламскім свеце», — падкрэсліў Мітрапаліт Вены.
Жыццё хрысціянаў у зоне канфлікту, як дадаў старшыня епіскапату Аўстрыі, «надзвычай складанае і поўнае небяспек». На думку іерарха, уцёкі людзей з’яўляюцца «цалкам зразумелай» рэакцыяй на пануючае становішча, бо ніхто не хоча, каб іх дзеці сталі ахвярамі вайны. Таму, лічыць кардынал, «надзвычай пільным і важным з’яўляецца наданне большага значэння міжнародным рухам за мір».
Паводле кардынала Шонбарна, дадзены канфлікт можна вырашыць толькі ў выніку больш цеснага супрацоўніцтва вялікіх дзяржаў: «Бясспрэчна, абавязковым з’яўляецца супрацоўніцтва ЗША і Расіі, каб урэшце ў Сірыі мог запанаваць мір».
