У Міністэрстве замежных спраў Італіі, у межах Міжнароднай канферэнцыі па абароне рэлігійных супольнасцяў, адбылася прэзентацыя новага Цэнтра маніторынгу становішча рэлігійных меншасцяў.
Пра гэта паведамляе руская версія Ватыканскага радыё.
Праз дыпламатычныя сувязі ў гэты Цэнтр пры італьянскім МЗС будуць прыходзіць сігналы з усяго свету пра найбольш значныя выпадкі злоўжыванняў і папярэджання аб крытычных сітуацыях, з мэтай абараніць свабоду веравызнання рэлігійных меншасцяў.
Паводле слоў міністра замежных спраў Італіі Анджэліна Альфано, занадта шмат людзей на кожным кантыненце сутыкаюцца з цяжкасцямі ў публічным вызнанні сваёй рэлігіі: сур’ёзныя парушэнні існуюць у 23 краінах.
«Свабода веравызнання павінна быць натуральным, першасным правам, і калі ў ім адмаўляюць, узнікаюць напружанасць і канфлікты».
Міністр падкрэсліў, што трэба пераадолець ілюзію таго, што паняцце «катакомбных хрысціян» адносіцца да далёкага мінулага, бо гэта рэчаіснасць, асабліва заўважная ў краінах Афрыкі і Блізкага Усходу.
