У суботні вечар 5 кастрычніка беларусы-католікі Масквы і сталічнага рэгіёна Расіі сабраліся ў капліцы кляштара айцоў францішканаў, каб разам памаліцца на роднай мове.
Пасля адарацыі Найсвяцейшага Сакрамэнту і Ружанца адбылася святая Імша, якую цэлебраваў айцец Пётр Карнелюк OFMConv.
Літургія слова 27-й звычайнай нядзелі ў цэнтр увагі ставіла адносіны паміж сужонкамі.
«У сучасных умовах людзі спрачаюцца, хто галоўны ў сужэнстве, хто мае права вырашаць лёс іншага, хто вызначае будучыню сям’і. Пан Бог вяртае нас да самага пачатку, да стварэння, да задумы Творцы пра чалавека», — адзначыў у гаміліі душпастыр маскоўскіх католікаў беларускага паходжання, дадаўшы, што першапачатковая задума Бога заключалася ў роўнай годнасці і адначасова ўзаемнай неабходнасці мужчыны і жанчыны адно ў адным.
«Стаць адным гэта азначае будаваць разам агульны шлях па жыцці, прымаць сваю пару з усімі слабасцямі і перавагамі. У Божых задумах сужэнства няма перавагі ці авалодвання сваёй жонкай ці мужам. Няма тыранаў і ахвяраў.
Чалавек створаны паводле вобразу і падабенства Бога, які ёсць Любоў. Таму задума Пана ў саюзе мужчыны і жанчыны — захаваць у чалавеку здольнасць да шчырай, самаадданай, пастаяннай любові ў сумесным жыцці», — падкрэсліў айцец Пётр.
Пасля Імшы беларусы каталіцкага веравызнання Масквы зладзілі пастырскую сустрэчу ў культурным цэнтры кляштара. Як сказаў пробашч маскоўскай катэдры, капліца гэтага кляштара — маскоўская Парцыюнкула. Так называецца невялічкі касцёлік, адноўлены святым Францішкам у Асізі. «Тут таксама няшмат месца, але ёсць Францішак і ёсць Езус», — сказаў святар.
Менавіта ўспаміну святога Францішка на наступны дзень пасля яго літургічнага ўспаміну была прысвечана сустрэча беларусаў-каталікоў са сваім душпастырам.
Яна працягнулася пры кубку гарбаты з самаробным печывам. У сяброўскай атмасферы сабраныя падзяліліся уражаннямі і апошнімі навінамі.
