22 сакавіка Старшыня Канферэнцыі Рыма-Каталіцкіх Біскупаў Украіны біскуп Луцкі Віталій Скамароўскі скіраваў адмысловы Зварот да вернікаў, у якім заахвочвае іх аднавіць акт прысвячэння Украіны Беззаганнаму Сэрцу Марыі.
Зварот быў апублікаваны на партале Рыма-Каталіцкага Касцёла ва Украіне rkc.org.ua.
Новаабраны кіраўнік украінскага рыма-каталіцкага епіскапату перадусім прыгадаў словы Папы Францішка, які ў той жа дзень падчас агульнай аўдыенцыі на плошчы Святога Пятра ў Ватыкане сказаў: «У суботу будзе святкавацца ўрачыстасць Звеставання Пана, і ў думках мы вяртаемся да 25 сакавіка мінулага года, калі Касцёл і чалавецтва, а асабліва Расія і Украіна, у еднасці з усімі біскупамі свету былі прысвечаны Беззаннаму Сэрцу Марыі. Не стамляймася даручаць справу міру Каралеве супакою».
Біскуп Скамароўскі нагадаў, што Святы Айцец заахвочвае кожнага верніка і супольнасць, асабліва малітоўныя групы, кожны год 25 сакавіка аднаўляць акт прысвячэння Багародзіцы, каб Яна, наша Маці, захавала ўсіх у еднасці і міры».
«Таму ў духу еднасці са Святым Айцом ва ўрачыстасць Звеставання Пана было б добра, каб кожная парафія і супольнасць аднавіла акт прысвячэння Украіны Беззаганнаму Сэрцу Марыі, каб праз заступніцтва Найсвяцейшай Дзевы Міласэрны Бог адарыў нас мірам, а грэшнікам даў навяртанне», — напісаў у сваім Звароце біскуп Віталій Скамароўскі.
