Усё больш і больш краін далучаюцца да малітвы аб вызваленні свету ад пандэміі, якую прапанавалі аўстрыйскія вернікі.
Як паведаміла 9 студзеня Беларуская рэдакцыя парталу Vatican News, ініцыятыва «Еўропа моліцца» запрашае людзей раз на тыдзень збірацца на супольную малітву, асабліва ружанцовую, на вуліцах, плошчах і ў касцёлах.
Цяпер у нямецкамоўных краінах існуе каля 700 месцаў, дзе хрысціяне розных канфесій моляцца аб спыненні пандэміі, аб пераадоленні падзелаў у грамадстве і аб навяртанні.
Як паведаміў Роланд Ноэ, дырэктар аўстрыйскага агенцтва kath.net, якое з’яўляецца галоўным натхняльнікам малітвы, яе ідэя распаўсюджваецца з берагоў Дуная на іншыя еўрапейскія краіны. У апошнія тыдні да яе далучыліся італьянцы, іспанцы, французы, швейцарцы, немцы, славенцы і палякі. На думку журналіста, людзей мабілізавалі новыя санітарныя абмежаванні, якія ў апошнія тыдні ўвялі ўрады многіх краін у сувязі з хуткім распаўсюджваннем штама омікрон.
З ініцыятывай вялікай малітвы на ружанцы аб спыненні пандэміі выступіў у лістападзе 2021 года зальцбуржскі святар Ігнац Штайнвэндэр, які крытыкуе выключэнне непрышчэпленых з грамадства. Ён нагадаў, што сучасны чалавек не бярэ пад увагу Бога і забыўся пра сілу малітвы.
Ініцыятыва таксама звязана з Аляксандрам Чугелем, заснавальнікам Інстытута святога Баніфацыя, аўстрыйскага аналітычнага цэнтра, які абараняе каталіцкую веру і з’яўляецца натхняльнікам ружанцовых працэсій з самага пачатку пандэміі.
Ён звяртае ўвагу на тое, што ў вырашэнні любых сусветных праблем хрысціянам патрэбная Божая дапамога, і Марыя з’яўляецца магутнай памочніцай на гэтым шляху.
Адсюль і заклік да малітвы на ружанцы ў інтэнцыі спынення пандэміі.
