Па ўсёй Польшчы праз каталіцкія парафіі сярод бацькоў будуць распаўсюджаны бясплатныя кнігі «Дзеці ў віртуальнай сетцы» і «Калі дзіця пытае пра секс». Брашуры падрыхтавала псіхолаг Богна Бялэцкая, старшыня Фонду аздараўленчай адукацыі і псіхатэрапіі.
Як паведамляе Каталіцкае інфармацыйнае агенцтва КАІ, у кнігах змешчана інфармацыя аб тым, як распазнаць, ці мае дзіця залежнасць ад смартфона, як перасцерагчы дзіця ад парнаграфіі ў інтэрнэце, як дапамагчы дзіцяці спраўляцца з пагрозамі віртуальнага свету і пра многае іншае.
«Касцёл стараецца падтрымліваць бацькоў у выхаванні дзяцей, якія з прычыны пандэміі часта не бачаць вакол сябе нічога акрамя экранаў», — адзначыў біскуп Сымон Стулкоўскі, адзін з ініцыятараў акцыі.
«Са шматлікіх даследаванняў мы ведаем, да якога вялікага спусташэння ў псіхіцы і эмацыянальным развіцці вядзе доступ да інтэрнэту і віртуальнага свету праз смартфоны, планшэты і камп’ютары»,— адзначаюць аўтары ініцыятывы, а таксама тлумачаць, што карыстанне прыладамі без правіл і кантролю дарослых уводзіць дзіця ў свет небяспечнага азарту, камп’ютарных гульняў, парнаграфіі, насілля і іншых залежнасцяў, якія непапраўна разбураюць псіхіку і мозг маладога чалавека.
«Нашыя публікацыі паказваюць, з аднаго боку, якім прыгожым дарам Стварыцеля з’яўляецца цялеснасць і сексуальнасць чалавека, а таксама якой важнай прыладай камунікацыі з’яўляецца інтэрнэт, а з іншага боку, выяўляюць небяспеку, а таксама даюць бацькам неабходныя веды для вырашэння магчымых праблем і для дзеянняў», — сцвердзіў біскуп Стулкоўскі.
На думку аўтараў ініцыятывы, брашуры набываюць асаблівую актуальнасць у сітуацыі віртуальных школьных заняткаў і адукацыі дзяцей праз інтэрнэт у час эпідэміялагічных лакдаўнаў.
