![](/3/images/news/2021/05/13285/2021-05-06-FB_post_1200x900_lednica-1024x768.jpg)
Найбуйнейшы агульнапольскі моладзевы форум у Ледніцы, сёлета ўжо юбілейны — ХХV, як і ў мінулым годзе, пройдзе ў анлайн-фармаце 5 чэрвеня.
Сёлетняя сустрэча пройдзе пад дэвізам «Пачуй!».
«Гэта запрашэнне прыслухоўвацца перш за ўсё да голасу Бога, але і да сябе таксама, што сёння, калі ў свеце пануе паўсюдны хаос, усё складаней», — адзначыла ў размове з Каталіцкім інфармацыйным агенцтвам КАІ намеснік каардынатара сустрэчы Анна Каўчар.
Яна нагадала, што для таго, каб навучыцца слухаць Бога і іншых, трэба «выйсці на пустыню», як называе гэтую прастору слухання Біблія.
«Асобаю, якая будзе спадарожнічаць моладзі падчас сёлетняга мерапрыемства, стане святы Ян Хрысціцель — настаўнік цішыні і прарок прастаты.З яго дапамогай мы хочам адкрываць прастору веры, якая перажываецца як індывідуальна, так і ў супольнасці Касцёла і ў адносінах з іншымі людзьмі», — патлумачыла Анна Каўчар.
Асновай разважанняў да юбілейнай сустрэчы стануць евангельскія тэксты пра асобу гэтага прарока.
Арганізатары падрыхтавалі Літанію выйсця на пустыню — адмысловую малітву, натхнёную дзейнасцю святога Яна Хрысціцеля, заклікамі якой удзельнікі форуму будуць маліцца, каб моладзь была здольная чуць голас Бога і прымаць Яго заклік.
Праграма агульнапольскай моладзевай сустрэчы будзе ўключаць таксама малітву за Касцёл, якую правядуць тры прадстаўнікі супольнасці Касцёла: свецкі вернік, кансэкраваная асоба і святар.
На тэрыторыі Ледніцкага парка будуць арганізаваныя спевы і танцы. Для ўдзельнікаў анлайн-форуму таксама будзе падрыхтавана балетная інсцэніроўка «Сустрэча з голасам».
Арганізатары адзначаюць, што пасля заканчэння пандэміі, выкліканай вірусам Covid-19, на тэрыторыі Ледніцкага ландшафтнага парка адновяцца рэгулярныя сустрэчы і будуць рэалізаваныя новыя праекты і ініцыятывы.
Трансляцыя XXV Сустрэча моладзі ў Ледніцы будзе арганізавана на канале YouTube Lednicy.
Моладзевы форум у Ледніцы — адзін з найбуйнейшых ва Усходняй Еўропе штогадовы фестываль каталіцкай моладзі, які збірае больш за 60 тысяч удзельнікаў. Максімальная колькасць удзельнікаў налічвалася ў 2004 годзе — каля 160 тысяч чалавек. У 2018 годзе агульнапольскую сустрэчу каталіцкай моладзі ў Ледніцы наведаў Прэзідэнт Польшчы Анджэй Дуда.