Паводле новых прынцыпаў, якія ўвойдуць у сілу з 1 мая, Патрыятычнае таварыства кітайскіх католікаў, а таксама мясцовая Канферэнцыя біскупаў будуць выбіраць, зацвярджаць і ўдзяляць пасвячэнне новым біскупам. Роля Папы ў гэтым працэсе ніяк не ўзгадваецца.
Як паведамляе інфармацыйнае агенцтва КАІ, апублікаваныя ў Кітаі «Адміністрацыйныя сродкі для духавенства рэлігій» былі перакладзены выданнем Bitter Winter, якое займаецца маніторынгам рэлігійнай свабоды ў свеце, з асаблівай увагай да КНР.
Паводле пададзеных у іх прынцыпаў, Патрыятычнае таварыства кітайскіх католікаў будзе адказваць за выбар кандыдатаў у біскупы. Іх зацвярджэнне і пасвячэнне будзе ў кампетэнцыі Кітайскай Канферэнцыі Каталіцкіх Біскупаў. Пасля біскупскага пасвячэнне Патрыятычнае таварыства кітайскіх католікаў і Канферэнцыя епіскапату інфармуе пра гэта Дзяржаўную адміністрацыю па справах рэлігій.
Там ніяк не ўзгадваецца роля Папы ці Святога Пасаду, нягледзячы на заключаную ў 2018 годзе часовую дамову адносна біскупскіх намінацый, дзеянне якой у мінулым годзе было працягнута на наступныя два гады.
Хоць змест дамовы публічна не агучваўся, тым не менш можна меркаваць, што выбраных у Кітаі біскупаў Святы Пасад зацвярджае або адхіляе. За гэты час тры намінацыі былі абвешчаны на падставе дамовы, дзякуючы якой было таксама вернута адзінства епіскапату Кітая з Папам.
Ключавым пунктам новых адміністрацыйных сродкаў з’яўляецца рэгістрацыя духоўных асоб у базе даных і прапагандаванне імі каштоўнасцяў, якія прызнае Камуністычная партыя Кітая.
Паводле трэцяга артыкула, духоўныя асобы «павінны любіць айчыну, падтрымліваць кіраўніцтва Патрыятычнага таварыства кітайскіх католікаў, выступаць за сацыялістычную сістэму», а таксама «трымацца кірункаў кітаізацыі рэлігіі ў Кітаі».
Практыка кітаізацыі, якая вядзецца ў апошнія гады Старшынёй КНР Сі Дзыньпінам, на практыцы азначае кантроль уладаў над рэлігійнай дзейнасцю.
Акрамя таго, духоўныя асобы павінны дзейнічаць «у падтрымку нацыянальнага адзінства, рэлігійнай згоды і сацяльнай стабільнасці». Яны абавязаны так кіраваць людзьмі, каб тыя былі патрыётамі і законапаслухмянымі грамадзянамі. Ім нельга дзейнічаць на шкоду нацыянальнаму адзінству і падтрымліваць тэрарыстычную дзейнасць.
Зарэгістраваная духоўная асоба не мае права арганізоўваць, быць гаспадаром і нават удзельнікам незацверджанай уладамі рэлігійнай дзейнасці, якая вядзецца па-за вызначанымі імі месцамі, а таксама навучаць па-за рэлігійнымі школамі.
Яна павінна належаць да адной з падпарадкаваных дзяржаве рэлігій. Такім чынам, не можа атрымаць рэгістрацыі пастар «хатняга касцёла» ці ксёндз з «падпольнай» супольнасці. Духавенства таксама абавязана праходзіць «палітадукацыю» і «культурнае выхаванне», а яго паводзіны будуць ацэньвацца ў адпаведнасці з вызначанай сістэмай узнагарод і пакаранняў.
На ўваходах у месцы культу будзе весціся назіранне, спраўджванне асобы і рэгістрацыя.
Паводле агенцтва CNA, каля шасці мільёнаў вернікаў зарэгістравалася ў Патрыятычным таварыстве кітайскіх католікаў. Яшчэ звыш 11 мільёнаў належаць да так званых «падпольных» супольнасцяў, падпарадкаваных Святому Пасаду, але непрызнаных кітайскімі ўладамі.
